لە ساڵیادی راگەیاندنی سەربەخۆیی فەلەستیندا، توركیا جەخت لە بەردەوامی پشتگیرییەكانی دەكاتەوە بۆ دامەزراندنی دەوڵەتێكی سەربەخۆ كە پایتەختەكەی قودسی رۆژهەڵات بێت.

بورهانەدین دوران، سەرۆكی فەرمانگەی پەیوەندییەكانی سەرۆكایەتیی كۆماری توركیا، لە 38ەمین ساڵیادی راگەیاندنی سەربەخۆیی فەلەستیندا رایگەیاند، وڵاتەكەی بەردەوام دەبێت لە پشتگیریكردنی گەلی فەلەستین بۆ دامەزراندنی دەوڵەتێكی سەربەخۆ و خاوەن سەروەری لەسەر بنەمای سنوورەكانی ساڵی 1967 كە قودسی رۆژهەڵات پایتەختەكەی بێت.

وتیشی، راگەیاندنی دامەزراندنی دەوڵەتی فەلەستین لە 15ی تشرینی دووەمی ساڵی 1988، گوزارشتێكی مێژوویی بوو لە ئیرادەی گەلی فەلەستین بۆ بەدەستهێنانی ئازادی و مافی چارەی خۆنووسین.

سەرۆكی فەرمانگەی پەیوەندییەكانی سەرۆكایەتیی كۆماری توركیا جەختیشیكردەوە، وڵاتەكەی لە هەمان رۆژدا دانی بە دەوڵەتی فەڵەستیندا ناوە و لەپاڵ خەباتی رەوای ئەو گەلەدا وەستاوە، ئێستاش بەردەوام دەبێت لە كاركردن بۆ بەدیهێنانی ئاشتییەكی بەردەوام لە ناوچەكەدا.

پێشتر و لە چوارچێوەی بەڕێوەچوونی نۆزدەیەمین خولی ئەنجومەنی نیشتمانیی فەلەستین لە جەزائیر لە 15ی تشرینی دووەمی ساڵی 1988، یاسر عەرەفات سەرۆكی كۆچكردووی دەسەڵاتی فەڵەستین جاڕنامەی سەربەخۆیی فەلەستینی خوێندەوە.

 

بۆ كۆتاییهێنان بە رۆتینات، وەزیری ناوخۆی عیراق فەرمانی كرد كارتی زانیاری و كارتی نیشتمانی بەخێرایی یەكبخرێن و خزمەتگوزارییەكان بكرێنە ئەلیكترۆنی.

یاسر مالكی، وەزیری ناوخۆی عیراق رایگەیاند، بە مەبەستی ئاسانكاری لە مامەڵەكاندا فەرمانی كردووە پەلە بكرێت لە رێكارەكانی یەكخستنی كارتی زانیاری لەگەڵ كارتی نیشتمانیدا، لەگەڵ ئەوەشدا بە بەرزترین ئاستی وردبینی و پیشەییبوونەوە مامەڵە لەگەڵ دۆسێی هاووڵاتییان بكرێت.

هاوكات فەرمانیشیكردوە، تەواوی ئەو خزمەتگوزارییانەی پێشكەش بە هاووڵاتییان دەكرێت بە ئەلیكترۆنی بكرێت بە جۆرێك هاووڵاتی بتوانێت لە ماڵەكەی خۆیەوە و لە رێگەی مۆبایلەكەیەوە مامەڵەكانی رایی بكات.

ئاماژە بەوەش كراوە، بۆ بێبەشنەبوونی رەوەندی عیراقی لە دەرەوەی وڵات، وەزیری ناوخۆ فەرمانی كردووە وێستگەی دەرهێنانی كارتی نیشتمانی لە سەرجەم باڵیۆزخانە و كونسوڵخانەكاندا كارابكرێن.

 

بەتۆمەتی بەهەدەردانی ملیاران دینار، دەستەی دەستپاكی و دەسەڵاتی دادوەریی عیراق سزای چەندین ساڵ زیندانیكردنیان بەسەر چەند لێپرسراوێكدا سەپاند و پابەندیان كردن بە گەڕاندنەوەی ئەو بڕە پارەیەی بە ناڕەوا دەستیان كەوتووە.

دەستەی دەستپاكیی عیراق رایگەیاند، دادگای بەرەنگاربوونەوەی تاوانەكانی گەندەڵیی ناوەندیی، بە تۆمەتی دەستكەوتنی 36 ملیار و 810 ملیۆن دیناری عیراقی بەشێوازێكی ناڕەوا، سزای حەوت ساڵ زیندانیكردنی بۆ خالد مەعازیدی بریكاری وەزارەتی كارەبا بۆ كاروباری گواستنەوە و دابەشكردن دەركردووە كە سێ ساڵیان زیندانیكردنی توندە، هەروەها پابەند كراوە بە گەڕاندنەوەی تەواوی ئەو بڕە.

لە راگەیەنراوێكی تریشدا، دەستەی دەستپاكیی ئاشكرایكرد، بەپێی ئامارەكانی فەرمانگەی لێكۆڵینەوەكانی دەستەكە، لە ماوەی ساڵانی 2024 بۆ 2026دا، 152 دۆسێی تاوانكاری و 76 سكاڵایان لەبارەی قاچاغچێتیكردن بە نەوتەوە تۆماركردووە.

لەلایەكی تریشەوە، ئەنجومەنی باڵای دادوەری عیراق رایگەیاند، دادگای تاوانەكانی رەسافە سزای 15 ساڵ زیندانیكردنی بەسەر تاوانبارێكی قاچاغچێتیكردن بە بەرهەمە نەوتییەكان سەپاند كە یەكێك لە بۆرییەكانی گواستنەوەكانی بەرهەمە نەوتییەكانی لە باشووری رۆژهەڵاتی بەغداد كونكردبوو.

ئەنجومەنەكە ئاماژەی بەوەش كردووە، دادگای لێكۆڵینەوەی تایبەت بە دۆسێكانی دەستپاكی لە پارێزگای میسان، فەرمانی دەستگیركردنی بۆ هەشت فەرمانبەری كۆمپانیای دابەشكردنی بەرهەمە نەوتییەكانی لە پارێزگاكە بە تۆمەتی بەهەدەردانی سامانی گشتی و گەندەڵی دەركردووە.

 

بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی لەگەڵ مامۆستا عەلی باپیر، سەرۆکی کۆمەڵی دادگەریی کوردستان کۆبووەوە.

لە کۆبوونەوەکەدا کە رەفعەت عەبدوڵا، جێگری سەرۆکی یەکێتی، شاڵاو کۆسرەت رەسوڵ، سالار لالە سەرحەد، لێپرسراوی بۆردی پەیوەندییە کوردستانییەکان ئامادەی بوون، دوایین پەرەسەندنەکانی دۆخی هەرێمی کوردستان و عیراق تاوتوێ کران.

هەردوولا بیروبۆچوونیان لەبارەی پرسە هەنووکەییەکانەوە ئاڵوگۆڕ کرد و جەختیان لە پەرەپێدانی پەیوەندییەکانی نێوان یەکێتی و کۆمەڵی دادگەری کردەوە.

سەرۆك وەزیرانی عیراق رێنمایی دەركرد بۆ دابینكردنی بڕی پێویست لە خۆراك و دەرمان و سوتەمەنی بەمەبەستی بەرەنگاربوونەوەی هەر قەیرانێكی سروشتی و مرۆیی.

بە سەرپەرشتی عەلی زەیدی، سەرۆك وەزیرانی عیراق دەستەی باڵای ئیدارەی فریاكەوتن و قەیران و كارەساتەكانی عیراق كۆبووەوە و تێیدا، پلانی ستراتیژی نیشتمانی بۆ بەرەنگاربوونەوەی قەیران و كارەساتەكان كە لەلایەن راوێژكاری ئاسایشی نەتەوەیی سەرۆك وەزیران ئامادەكرابوو خرایە بەرباس.

بەپێی راگەیەندراوەكەی، لە كۆبوونەوەكەدا عەلی زەیدی جەختیكردەوە لە گرنگی دابینكردنی بڕی پێویست لە خۆراك، دەرمان و سوتەمەنی پێویست بۆ هەر قەیرانێكی سروشتی و مرۆیی، جەختیشیكردەوە، لە گرەنتیكردنی پاراستنی دامەزراوە خزمەتگوزارییەكان و وەزارەتی دارایی راسپارد شایستەی دارایی پێویست بۆ ئەو مەبەستە دابین بكات.

لە بەشێكی تری كۆبوونەوەكەشدا، گفتوگۆكرا لەبارەی گرنگی و پتەوكردنی هاوبەشەییە نێودەوڵەتییەكان بۆ بەرەنگاربوونەوەی قەیرانەكان.