پەیمانگەی نەتەوەیی میسڕ بۆ توێژینەوەی فەلەكی و جیۆفیزیكییەكان رایگەیاندووە، رۆژی سێشەممە، 17ـی شوبات، یەكەم خۆرگیرانی ئەمساڵ روو دەدات و بەشێوەی ئەڵقەیی دەبێت، بە جۆرێك سێبەری مانگ وەك بازنەیەک ناوەندی خۆر دەگرێت و ئەڵقەیەك لە رووناكی بە چواردەوریدا دەمێنێتەوە.
ئەم جۆرە خۆرگیرانە بە ئەڵقەی ئاگرین ناسراوە و لەچاو جۆرەكانی دیكەی خۆرگیراندا كەمتر روو دەدات، بۆیە زانایان گرنگییەكی تایبەتی پێدەدەن.
پەیمانگەكە ئەوەشی خستووەتەڕوو، سەرەڕای ئەوەی دیاردەكە خۆرگیرانی ئەڵقەییە، بەڵام لە ئاسمانی بەشێک لە وڵاتاندا وەک خۆرگیرانی بەشەكیی دەردەكەوێت و سێبەری مانگ دەچێتە سەر بەشێكی خۆر، جگە لەوەش لە هەموو ناوچەیەكدا دەرناكەوێت.
كاتەكانی خۆرگیران بەپێی ناوچەكان جیاواز دەبێت و زانایانی فەلەكیش هۆشداری دەدەن لەوەی، نابێت راستەوخۆ سەیری خۆر بكەن، چونکە زیان بە تۆڕی چاو دەگەیەنێت.
سبەینێ خۆرگیرانی ئەڵقەیی روو دەدات
کوردسات
21:00:00 2026/02/15
چاوەڕوان دەكرێت سبەینێ یەكەم خۆرگیرانی ئەمساڵ روو بدات کە بە خۆرگیرانی ئەڵقەیی ناسراوە، زانایانی فەلەكیش هۆشداری دەدەن لەوەی، نابێت راستەوخۆ سەیری خۆر بكرێت.
