هەواڵنیگەرانییە سەربازییەکانی ئیسرائیل بەرانبەر ئەگەری دەستپێکردنی هەڵمەتێکی بۆردومانی خێرای ئەمریکا بۆ سەر ئێران لە هەڵکشاندایە؛ بەپێی راپۆرتێکی رۆژنامەیەکی ئیسرائیلی، تەلئەبیب مەترسیی هەیە هێرشە خێراکانی واشنتۆن نەبنە هۆی کۆتاییهێنان بە دەسەڵاتی تاران و لەناوبردنی تەواوەتیی بەرنامە ئەتۆمییەکەی.
سەرکردایەتیی سەربازیی ئیسرائیل نیشانەی نیگەرانیی بەرانبەر ئەگەری هەڵمەتێکی بۆردومانی خێرای ئەمریکا بۆ سەر ئێران نیشان دەدات، بە تایبەتی دوای هەڵبژاردنەکانی نیوەی خولی کۆنگرێسی ئەمریکا لە هەفتەی داهاتوودا، تێڕوانینی ئیسرائیل وا کە ئەو جۆرە هێرشە ناتوانێت کۆتایی بە دەسەڵاتی ئێران بهێنێت و ئامانجە سەربازییەکانی ئیسرائیل بپێکێت.
بەپێی راپۆرتێکی رۆژنامەی "هارتس"ـی ئیسرائیلی، لێپرسراوانی ئیسرائیل نیگەرانن لەوەی دۆناڵد ترەمپ سەرۆکی ئەمریکا دوای ئەنجامدانی لێدانە سەربازییەکان، بەرەو ئیمزاکردنی رێککەوتنێک لەگەڵ تاران هەنگاو بنێت؛ ئەمەش وەک ئەوەی لە دوو گەڕی هێرشەکانی پێشتریدا رویدا، وا لە ئێران دەکات توانای بەرگریی خۆی زۆر زیاتر لە رابردوو بەهێز بکاتەوە.
ئەم ئاگادارییانە ئاشکرای دەکەن کە ناکۆکی لە نێوان ئیسرائیل و ئەمریکادا هەیە لەسەر ئەو ئامانجانەی پێویستە لە ئەگەری هەڵگیرسانی جەنگێکی نوێدا بپێکرێن.
لە کاتێکدا بنیامین نەتانیاهۆ سەرۆک وەزیرانی ئیسرائیل کۆتاییهێنان بە دەسەڵاتی ئێران و تێکدانی تەواوەتی بەرنامە ئەتۆمییەکەی کردووەتە ئامانجی سەربازیی خۆی، واشنتۆن تەنها هەوڵی ئەوە دەدات دەستکەوت و سازش لە تاران وەربگرێت سەبارەت بە بەرنامە ئەتۆمییەکەی و دەستەبەرکردنی ئازادیی کەشتیوانی لە گەروی هورمزدا.
رۆژنامەی "هارتس" ئەوەشی خستووەتەڕوو، ئەفسەرانی هەواڵگریی سەربازیی ئیسرائیل و هێزی ئاسمانیی ئەو وڵاتە گومانیان لەوە هەیە هەڵمەتێکی هێرشی ئاسمانیی ئەمریکا کە چەند رۆژێک بخایەنێت، بتوانێت دەسەڵاتی ئێران ناچار بە خۆبەدەستەوەدان بکات، چ جای ئەوەی ببێتە هۆی کۆتاییهێنان بە دەسەڵاتەکەی.
تەنانەت هەڵسەنگاندنەکانی هەواڵگریی ئیسرائیل هۆشداری دەدەن کە هێرشە نوێیەکان لە باشترین حاڵەتدا تەنها دەبنە هۆی دواخستنی بەرنامە ئەتۆمییەکەی ئێران؛ چونکە تاران شوێنە هەستیارەکانی بەهێز کردووە و تا ئێستاش توانای ئەوەی هەیە بنکە و ژێرخانە تێکچووەکانی جارێکی تر دروستبکاتەوە و زیانەکانی سیستمی بەرگریی خۆی پڕبکاتەوە.
فەرماندە سەربازییەکانی ئیسرائیل کابینەی حکومەتەکەیان ئاگادارکردووەتەوە کە بەشداری کردن لە هەڵمەتێکی سەربازیدا بەبێ رێککەوتنی پێشوەختە لەسەر ئامانجی روون و هاوبەش، رێگە بە واشنتۆن دەدات بەپێی مەرجەکانی خۆی لە جەنگەکە بکشێتەوە بەبێ گوێدانە ئیسرائیل، بەمەش ئیسرائیل لە جەنگێکی کراوە و بەبێ کاتپێویستدا دەمێنێتەوە کە تێچووی سەربازی و ئابوریی بەردەوام لە بەرزبوونەوەدا دەبێت.
لێپرسراوانی وەزارەتی بەرگریی ئیسرائیل دان بەوەدا دەنێن کە ئێران توانای خۆڕاگریی بەردەوامی هەیە بەرانبەر بە لێکەوتەکانی جەنگ و گۆڕەپانی گەمارۆی دەریایی بۆ ماوەی دوو ساڵی تریش، بەمەش دەتوانێت تا کۆتایی هاتی خولی ئیدارەی ئێستای ئەمریکا خۆی رابگرێت بەبێ دەستبەرداربوون لە ئامانجە سەرەکییەکانی.
لە لایەکی ترەوە، دارێژەرانی پلانی سەربازیی ئیسرائیل دان بەوەدا دەنێن کە بەدەستهێنانی پشتگیریی جەماوەری بۆ هەڵگیرساندنی جەنگێکی نوێ دوای هەڵبژاردنە پەرلەمانییەکانی'کنێست'ـی ولاتەکەی، کارێکی ئاسان نابێت.
مەترسییەکانی ئیسرائیل لە خێرایی بووژانەوەی تواناکانی ئێران
بەپێی راپۆرتەکە، لێپرسراوانی بەرگریی ئیسرائیل بەردەوام سەرسامیی خۆیان دەربڕیوە بەرانبەر بەو خێراییەی کە ئێران توانیویەتی تواناکانی بەرهەمهێنانی موشەکی بالیستی نۆژەن بکاتەوە دوای هەر هەڵمەتێکی بۆردومانی ئەمریکی و ئیسرائیلییەوە.
زانیارییەکانی ناو راپۆرتەکە ئاماژە بەوە دەکەن، یەدەگی موشەکیی ئێران لە نێوان جەنگی حوزەیرانی 2025 و شوباتی 2026 دا نزیکەی دوو بەرانبەر زیادی کردووە و گەیشتووەتە رێژەی دوو هەزار و 500 موشەک.
ئاژانسەکانی هەوال ئاماژە بەوە دەکەن، سەرەڕای ئەوەی ئێران بەرکەوتەی زیاتر لە 20 هەزار لێدانی ئەمریکی و ئیسرائیلی بووە، بەڵام تا ئێستاش خاوەنی سەدان و هەزاران موشەکە و توانای داخستنی گەروی هورمزی هەیە.
هەروەها تاران سودی لە سەقامگیرییە کاتییەکان وەرگرتووە بۆ دووبارە پڕکردنەوەی کۆگاکانی سەربازی و بەهێزکردنی بەرگرییەکانی خۆی بە مەبەستی رووبەڕووبوونەوە لەگەڵ هەر ئەگەرێکی نوێدا.
هاوکات، کەناڵی 15ـی ئیسرائیلی بڵاویکردەوە، سوپای ئیسرائیل سەرجەم ئامادەکارییە سەربازییەکانی بۆ ئەنجامدانی هێرش بۆ سەر ئێران تەواو کردووە.
کەناڵەکە ئاماژەی بەوەکردووە، سوپای ئیسرائیل لە "ئامادەباشیی بەرزدایە بۆ هێرشکردنە سەر ئێران"، و روونیکردووەتەوە کە ئیسرائیل پێیوایە هەڵمەتی سەربازیی داهاتوو زۆر دەخایەنێت.
کەناڵەکە ئاشکراشیکردووە، ئەم گرژییانە لە کاتێکدا روو دەدەن کە ئیسرائیل لە ناوخۆدا لە رەوشێكی ئاڵۆزی سیاسی و پشێویدایە، هاوکات لەگەڵ پێشهاتە سیاسییەکانی ئەمریکا؛ ئەم هۆکارانەش بەیەکەوە بڕیاردەرانی ئیسرائیلیان لەبەردەم رێڕەوێکی زۆر هەستیار و یەکلاکەرەوەدا داناوە.
کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، لە سلێمانی و ناوچەکانی دەوروبەری ئەگەری نمەباران هەیە.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان لە نێوان پەڵەهەور بۆ نیمچەهەور دەبێت، هەروەها ئەگەری بارینی نمە بارانێکی کەم لە هەندێک کاتدا لە دەوروبەری سنوری پارێزگاکانی سلێمانی و هەڵەبجە و بەشێک لە ئیدارەی گەرمیان هەیە.
کەشناسی ئاماژەی بەوەشکردووە، سبەینێ ئاسمان لە نێوان پەڵە هەور و نیمچە هەوردا دەبێت و لە کاتەکانی ئێوارەدا ئەگەری بارینی تاوە بارانی کورتخایەن هەیە، بە تایبەتی لە سنوری پارێزگای سلێمانی و هەڵەبجە و دەوروبەریان، هاوکات پلەکانی گەرماش یەک بۆ دوو پلە بەراورد بە تۆمارەکانی ئەمڕۆ بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 27 پلەی سیلیزی
سلێمانی: 24 پلەی سیلیزی
دهۆک: 26 پلەی سیلیزی
هەڵەبجە: 26 پلەی سیلیزی
سۆران : 25 پلەی سیلیزی
پیرمام: 24 پلەی سیلیزی
چەمچەماڵ: 27 پلەی سیلیزی
زاخۆ: 26 پلەی سیلیزی
گەرمیان: 31 پلەی سیلیزی
حاجی ئۆمەران: 16 پلەی سیلیزی
رۆژی 29ـی 10ـی 2026، هاووڵاتییەک بەناوی 'ئارام محەمەد حەمەساڵح' لە قەزای شارەزور بە دەستڕێژی گولـلە کوژرا و ئەمڕۆش تۆمەتباری کوشتنەکە دەستگیرکرا.
دەزگای ئاسایشی هەرێم رایگەیاندووە، دوای ئەوەی لە رۆژی 29ـی 10ـی 2026، لەقەزای شارەزوور هاووڵاتییەک بە دەستڕێژی گولـلە کوژرا، بەدواداچوون و لێکۆڵینەوە ئەنجامدرا، شوێنی خۆحەشاردانی تۆمەتبار دەستنیشان كرا و شەوی رابردوو تۆمەتبار خۆی رادەستی بەڕێوەبەرایەتی ئاسایشی پارێزگای هەڵەبجە کرد و دەستگیرا بەسەر ئۆتۆمبێل و دەمانچەی تۆمەتباردا.
بەپێی زانیارییەکانی دەزگای ئاسایشی هەرێم، لەئێستادا تۆمەتبار بەماددەی (406)لەیاسای سزادانی عیراقی راگیراوە و لێکۆڵینەوە لەدۆسیەکە بەردەوامە.
ئەمڕۆ دوانزەهەمین فێستیڤاڵی هەنار لەژێر دروشمی "فێستیڤاڵی هەناری هەڵەبجە" کۆتایی پێدێت.
ئەمڕۆ شەممە 31ـی10ـی2026 کۆتا رۆژی فێستیڤاڵی هەنارە، کە گەشتیارێکی زۆر لە ناوخۆی هەرێمی کوردستان و ناوەڕاست و خواروی عیراق و رۆژهەڵاتی کوردستان و سەردانی فێستیڤاڵەکە دەکەن.
فێستیڤاڵەکە لەناو پارکی شاری یاریی هەڵەبجە بەڕێوەدەچێت، کە ئەمساڵ لەژێر دروشمی "فێستیڤاڵی هەناری هەڵەبجە"یە و 500 کەپر ئامادەکراوە کە تێیدا هەنار و خواردنی وشکە و بەروبومە کشتوکاڵییەکان و کاری دەستڕەنگینی خانمانی تێدا نمایشدەکرێن و دەفرۆشرێن.
ئەمەش لە کاتێکدایە، رۆژی چوارشەممە 28ـی 10ـی2026 دوانزەهەمین فێستیڤاڵی هەنار لە هەڵەبجە دەستیپێکرد.
وەزارەتی دەرەوەی ئەمریکا ئاشکرایکرد، وڵاتەکەی رەزامەندیی داوە لەسەر فرۆشتنی 500 موشەکی جۆری "پاتریۆت پاک-3" بە ئۆکراین، بە بڕی 2.1 ملیار دۆلار.
بەپێی راگەیەنراوێکی وەزارەتی دەرەوەی ئەمریکا، ئۆکراین تێچووی ئەو موشەکانە لە رێگەی هاوکارییەکانی کەنەدا، ئەڵمانیا، نەرویژ و قەرزەکانی یەکێتیی ئەوروپاوە دابین دەکات، هەروەها کۆمپانیای "لۆکهید مارتن" بەڵێندەری سەرەکیی جێبەجێکردنی گرێبەستەکەیە.
ئەم بڕیارەی واشنتۆن لە کاتێکدایە، ڤۆلۆدیمێر زیلینسکی، سەرۆکی ئۆکراین ئاماژەی بەوە کردبوو نزیکەی مانگێکە چاوەڕێی رەزامەندیی ئەمریکان بۆ گەیاندنی ئەو موشەکە گرنگانە، بە تایبەت لە کاتێکدا روسیا هێرشەکانی بۆ سەر ژێرخانی مەدەنی و وێستگەکانی وزە و کارەبا چڕتر کردووەتەوە.
ماڵپەڕی ئەكسیۆس لەسەر زاری لێپرسراوانی ئەمریكاوە ئاشكرای دەكات، ئەگەر كۆمارییەكان لە هەڵبژاردنی نیوەی خولی كۆنگرێسدا شكست بهێنن، ئەگەری هەیە دۆناڵد ترەمپ فەرمانی ئەنجامدانی ئۆپەراسیۆنی سەربازی لە دژی ئێران دەربكات.
ماڵپەڕی ئەكسیۆس لەسەر زاری لێپرسراوێكی كۆشكی سپییەوە بڵاویكردەوە، لە ئەگەری شكست هێنانی پارتی كۆماری لە هەڵبژاردنەكاندا، رەنگە سەرۆكی ئەمریكا پەنا بۆ بژاردەی سەربازی ببات و فەرمانی هێرشکردنە سەر ئێران دەربكات، چونكە ئەم ئەگەرە لە ناو هەڵسەنگاندنەكانی ئیدارەی ئەمریكادا بە هەڵپەسێردراوی ماوەتەوە.
لە بەشێكی تری راپۆرتەكەدا، ئەو لێپرسراوە ئەمریكییە ئاماژەی بەوەكرد، باشترین دەرفەت لەبەردەم ئێران بۆ گەیشتن بە رێككەوتن لەگەڵ ئەمریكا لەم قۆناغەی ئێستادایە، پێش ئەوەی هاوكێشە سیاسی و سەربازییەكان بگۆڕێن.
وەزیری گەیاندنی عیراق رایدەگەیەنێت، مانگی داهاتوو لەگەڵ سێ وڵات گرێبەست ئەنجامدەدەن بۆ تێپەڕبوونی هێڵی ئینتەرنێتی ئەو سێ وڵاتە بە خاكی عیراقدا بۆ وڵاتانی ئەوروپا.
مستەفا سەنەد، وەزیری گواستنەوە و گەیاندنی عیراق رایگەیاند، رۆژی 9ـی مانگی داهاتوو و لە پەراوێزی هەڵبژاردنی یەكێتی نێودەوڵەتی گەیاندن وەزارەتی گواستنەوە و گەیاندنی عیراق، لەگەڵ سێ وڵات گرێبەست ئەنجامدەدات بۆ تێپەڕبوونی هێڵی ئینتەرنێتی ئەو وڵاتە بە خاكی عیراقدا بۆ ئەوروپا.
ئەوەشی خستەڕوو، گرێبەستەكان پێگەی عیراق وەك ناوەندێكی هەرێمی و ئامرازێك بۆ گواستنەوەی نێودەوڵەتی داتا پتەوتر دەكات.
ناتانیاهۆ و هاوپەیمانەكانی هەوڵدەدەن رێگریی لە پێكهێنانی حكومەتی كەمینە بكەن لەلایەن بەرەی ئۆپۆزسیۆن و پارتە عەرەبییەكانەوە.
كەناڵی 12ی ئیسرائیلیی ئاشكرایكردووە، بنیامین ناتانیاهۆ سەرۆكی پارتی لیكۆد كۆبوونەوەیەكی نهێنی دورودرێژی لەگەڵ ئیتمار بن غەقیر سەرۆكی پارتی هێزی یەهود ئەنجامداوە و تەوەری سەرەكی گفتوگۆكانیشیان چۆنیەتی رێگریكردن بووە لە بەرەی ئۆپۆزسیۆن و پارتە عەرەبییەكان لە پێكهێنانی حكومەتێكی كەمینەی جێگرەوە.
ئاماژە بەوەشكراوە، پارتی هێزی یەهود كە ئیتمار بن غەفیر سەرۆكایەتی دەكات بە رەسمی باسی لەوە كردووە كە ناتانیاهۆ و بن غەفیر بەهەموو شێوەیەك هەوڵ بۆ پاراستنی حكومەتی راستڕەو و رێگریكردن لە پێكهێنانی حومەتێكی چەپ دەكەن لەلایەن ئۆپۆزسیۆن و پارەتە عەرەبییەكانەوە كە كار بۆ ئەوە دەكەن ئیئتیلافێكی حكومی پێكبهێنن.
بەپێی ئەنجامەكانی هەڵبژاردنەكەی كنسێت كە چەند رۆژی رابردوو بەڕێوەچوو، بەرەی ناتانیاهۆ 53 كۆرسی و بەرەی ئۆپۆزسیۆن 48 كورسی و پارتە عەرەبییەكانیش 19 كورسییان بەدەستهێناوە، بەوەش هیچ كامیان نەیانتوانیوە زۆرینەی رەها بەدەستبهێنن.
لە ئیتاڵیا خۆپیشاندانێكی فراوان لە دژی حكومەتەكەی میلۆنی بەڕێوەدەچێت و حكومەت بە هۆكاری گرانی و بەرزبوونەوەی هەڵاوسانی ئابوری دەزانن.
خۆپیشاندانی فراوان بەشێكی زۆری شارەكانی ئیتاڵیای گرتەوە، كە بەشێكی زۆری خۆپیشاندەران خوێندكارانی خوێندنگە و زانكۆ و پەیمانگە و سەندیكاكانی كرێكاران بوون، چاوەڕوانیش دەكرێت خۆپیشاندانەكە زیاتر فراوان ببێت و 50 شاری ئیتاڵیا بگرێتەوە.
خۆپیشاندەران حكومەتەكەی جۆرجیا میلۆنی سەرۆك وەزیرانی ئیتاڵیا كە لە سێ هاوپەیمانێتی پێكدێت، بە هۆكاری سەرەكی گرانی لە بازاڕەكان و كەمبوونەوەی موچە و بەرزبوونەوەی رێژەی هەڵاوسان و بەرزبوونەوەی تێچووی ژیان دەزانن، خوێندكارانیش داوا دەكەن، بودجەی تایبەت بە كەرتی پەروەردە و خوێندنی باڵا زیاد بكرێت.
سەندیكاكانی كرێكارانیش لەدژی پلانەكانی حكومەت داوا دەكات كارمەندانی چەند كەرتێك مانگرتن رابگەیەنن، لەوانەش گواستنەوەی گشتیی ناوخۆیی و دورمەودا و كەرتی تەندروستیی.
وەزارەتی بەرگریی روسیا ئاشکرایکرد، سیستمەکانی بەرگریی ئاسمانیی وڵاتەکەی لە شەوی رابردوودا توانیویانە هەزار و 43 درۆنی ئوکرانی لە چەندین ناوچەی جیاوازی روسیا بخەنە خوارەوە.
وەزارەتی بەرگریی روسیا لە راگەیەنراوێکدا بڵاویکردەوە، "پرۆسەی تێکشکاندن و خستنەخوارەوەی درۆنەکان ئاسمانی ناوچەکانی بیلگۆرۆد، بریانسک، ڤۆرۆنیژ، ڤۆڵگۆگراد، کورسک، کالوگا، کۆسترۆما، ئۆریۆل، بینزا، ڕۆستۆڤ، ڕیازان، سمۆلێنسک، سامارا، ساراتۆڤ، تەڤیر، تولا و یارۆسلاڤل، هەروەها مۆسکۆ و دەوروبەری و کۆماری تاتارستانی گرتووەتەوە".
ئەوەشی خستەڕوو، لەلایەن سیستمی بەرگرییەکانیانەوە، توانیویانە بەرپەچی زۆربەی درۆنەکانی ئۆکراین بدەنەوە بیخەنەخوارەوە.
کەشناسیی هەرێم ئاشکرایدەکات، شەپۆلێکی بارانبارین بەشێک لە ناوچەکانی کوردستان دەگرێتەوە و پلەکانی گەرماش گۆڕانکارییان بەسەردا دێت.
بەڕێوەبەرایەتی گشتیی کەشناسیی و بوومەلەرزەزانیی هەرێم پێشبینییەکانی کەشوهەوای بۆ 24 سەعاتی داهاتوو بڵاوکردەوە و ئاماژەی بەوەکرد، ئەمڕۆ ئاسمان نیمچەهەور بۆ هەوری تەواو دەبێت، بارانبارین بە پچڕپچڕی لە سنووری پارێزگای دهۆک و ئیدارەی زاخۆوە دەستپێدەکات و پاشان کاریگەرییەکەی درێژدەبێتەوە بۆ ناوچەکانی ئیدارەی سۆران، راپەڕین، پارێزگای سلێمانی و هەڵەبجە.
راشیگەیاند، لە هەندێک کاتدا بارانبارینەکە بە شێوەی تاوەباران و هەورەبروسکە دەبێت، بەڵام لە ناوچەکانی ناوەڕاست و باشوری هەرێم ئەگەری بارانبارین کەمتر دەبێت لە کاتەکانی شەودا کەشوهەوا سەقامگیر دەبێتەوە.
سەبارەت بە کەشوهەوای سبەینێ کەشناسیی هەرێم ئەوەشی خستەڕوو، ئاسمانی هەرێم لە نێوان پەڵەهەور و نیمچەهەوردا دەبێت، لەگەڵ ئەگەری بارینی کەمێک نمەباران لە ناوچەکانی پارێزگای سلێمانی و دەوروبەری، پلەکانی گەرماش بەراورد بە تۆمارکراوەکانی ئەمڕۆ، کەمێک بەرزتر دەبنەوە.
بەرزترین پلەکانی گەرمای پێشبینیکراوی سبەینێ:
هەولێر: 27 پلەی سیلیزی
سلێمانی: 26 پلەی سیلیزی
دهۆک: 25 پلەی سیلیزی
هەڵەبجە: 27 پلەی سیلیزی
سۆران : 21 پلەی سیلیزی
پیرمام: 23 پلەی سیلیزی
چەمچەماڵ: 27 پلەی سیلیزی
زاخۆ: 26 پلەی سیلیزی
گەرمیان: 32 پلەی سیلیزی
حاجی ئۆمەران: 16 پلەی سیلیزی
ماڵپەڕی شەفافییەت داهاتی نانەوتی ئەم هەفتەیەی سلێمانی بڵاوکردەووە، کە زیاتر لە 12 ملیار دینارە.
ماڵپەڕی شەفافییەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان بڵاویکردەووە، لە رۆژی 24ـی10ـی2026 تا 30ـی10ـی2026 داهاتی نانەوتی 12 ملیار و 150 ملیۆن دیناربووە.
ئاماژەی بەوەشکردووە، بە بەراورد بە هەفتەی رابردوو نزیکەی سێ ملیار دینار داهات کەمی کردووە.
ماڵپەڕی شەفافییەت ئەوەشی خستەڕوو، لە ٪87 داهاتەکە بە شێوەی نەختینەیە و لە ٪13ـی بەشێوەی چەکە.
جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.
