ئەڵماسی سرووشتی لە قووڵایی 150 بۆ 200 کیلۆمەتر لە ناخی زەویدا لەژێر گەرمی و پەستانێکی زۆردا دروست دەبن، ئەویش لە ئەنجامی کۆبوونەوەی ئەتۆمەکانی کاربۆن و پەیدابوونی پێکهاتەی بلووریی ئەڵماس، کە بەپێی هەندێک لە توێژینەوەکان، هەندێک لەم بەردە بەنرخانە تەمەنیان لە نێوان 3.3 بۆ 3.5 ملیار ساڵە.
هەندێک جار لە ئەنجامی تەقینی گڕکانەکانەوە بەردی کیمبەرلایت و لامپرۆیت لەرووی زەوی نزیک دەبنەوە و مرۆڤ بەوهۆیەوە بە ئاسانی بەدەستیان دەخات؛ بە وتەی جیۆلۆجیستەکان، هەر ئەڵماسێکی سرووشتی مۆرێکی تایبەتی جیۆلۆجی لەسەرە کە ئاماژە بە کاتی پەیدابوونی دەکات.
لە کاتێکدا دروستبوونی ئەڵماس و بەردی گرانبەها ملیاران ساڵیان پێویستە، بەڵام چین لە ئێستادا لەڕێی تاقیگە پێشکەوتووەکانیەوە بە چەند رۆژێک دەتوانێت ژمارەیەکی زۆری لێ بەرهەم بهێنێت، ئەویش بە بەکارهێنانی تەکنەلۆژیای پێشکەوتووی پەستان و پلەی گەرمیی بەرز، لەگەڵ نیشتنی هەڵمی کیمیایی، هەموو ئەم پڕۆسەیە لە ژوورێکی خاڵی لە هەوا بەڕێوەدەچێت و لە کۆتاییدا ئەڵماسێکی پاک و پوخت بەرهەم دێت.
چین تەنیا لە ماوەی هەفتەیەکدا زیاتر لە 20 ملیۆن ئەڵماسی بەرهەم هێناوە، ئەمەش وایکردووە وڵاتەکە لە بازاڕی ئەڵماس و بەردە گرانبەهاکاندا رۆڵی بەرچاوی هەبێت و دەستی لە گۆڕانکاریی لە نرخدا هەبێت.
ئەوەی بە ملیارێک ساڵ دروست دەبێت، چین بە هەفتەیەک دروستی دەکات
کوردسات
22:15:00 2025/09/30
ئەڵماس لە سرووشتدا پێویستی بە زیاتر لە ملیارێک ساڵە بۆ ئەوەی پەیدا ببێت، بەڵام چین تەنیا بە هەفتەیەک لە تاقیگەکانیدا توانیویەتی زیاتر لە 20 ملیۆن ئەڵماس دروست بکات.
