مەكتەبی سیاسی یەكێتیی نیشتمانیی كوردستان، بە بۆنەی یادی 38 ساڵەی کیمیاباران و جێنۆسیادی هەڵەبجەوە پەیامێکی بڵاوکردەوە و تێیدا هاتووە؛  ئەو یادە بیرەوەری تاڵی تاوانێکی بێ وێنەیە لەسەر دەستی رژێمی بەعس بەرانبەر ئەم شارە و خەڵکەکەی  كرا.

هەروەها ئاماژەی بەوەشکردوە، تا سەندنەوەی هەقی یەکجارەکی هەڵەبجەش ئەم زامە ساڕێژنەبووە و هەروا قوڵپ دەدات و ئەمساڵ كەئەم یادە دەكەینەوە، هەڵەبجە بە هەوڵی بێوچانی دڵسۆزان، بەرەسمی چوارەمین پارێزگای هەرێم و نۆزدەیەمین پارێزگای عیراقی فیدراڵە.

مەکتەبی سیاسی یەکێتی داواش دەکات هەموومان لە پێناوی هەڵەبجەیەکی ئاوەدان و بوژاوە و سەربەرز  گشت تواناکانمان بخەینەگەڕ تاوەكو ماف و شایستە داراییەكانی وەك پارێزگا لە بوجەی گشتیی عێراقدا بچەسپێنرێت.

 

دەقی پەیامەکە

پەیامی مەکتەبی سیاسیی بۆ ساڵیادی كیمیاباران و جینۆسایدی هەڵەبجە

یادی ٣٨ ساڵەی كیمیاباران و جینۆسایدی هەڵەبجە، بیرەوەرییەكی خەمناك و زامێكی قووڵی نیشتمانی و نەتەوەییە، بیرەوەری تاڵی تاوانێکی بێ وێنەیە لەسەر دەستی رژێمی بەعس بەرامبەر ئەم شارە و خەڵکەکەی  كرا کە بێگومان تا سەندنەوەی هەقی یەکجارەکی هەڵەبجەش ئەم زامە ساڕێژنەبووە هەروا قوڵپ دەدات

ئەمساڵ كەئەم یادە دەكەینەوە، هەڵەبجە بە هەوڵی بێوچانی دڵسۆزان، بەرەسمی چوارەمین پارێزگای هەرێم و نۆزدەیەمین پارێزگای عێراقی فیدراڵە، بۆیە جیاواز لە ساڵانی رابوورد، ئەركی هەموومانە لە پێناوی هەڵەبجەیەکی ئاوەدان و بوژاوە و سەربەرز  گشت تواناکانمان بخەینەگەڕ تاوەكو ماف و شایستە داراییەكانی وەك پارێزگا لە بوجەی گشتیی عێراقدا بچەسپێنرێت، بەجورێک ئەوەی لە دوای راپەڕینەوە حزب و حکومەت پێشكەشی ئەم شارەی كردوە ، بە خزمەتی چەند قاتە پایەدارتر بکرێت و لەوە زیاتر و زۆرتر بۆ هەڵەبجە بکرێت

جارێکی تر لە ئاست ڕۆح و یادی  پێنج هەزار شەهیدی بە ناهەق خوێن رژاوی بووکی شارەزوور، سەری رێز و نەوازش دادەنەوێنین،  بۆ قوربانیان و یادگارە شیرینەکانی شەهیدانی هەڵەبجەش دەڵێین ئەركمانە هەمیشە بەدەنگ هاواریانەوە بێین و بە تەنگ داخوازییە رەواکانیانەوە بچین

تا ئەبەد هەڵەبجە برینی سارێژ نەبووی نەتەوەیەکە کە هەمیشە لە بیرمانە و لە یاد ناکرێت.

 

مەكتەبی سیاسی

یەكێتیی نیشتمانیی كوردستان

وەزارەتی نەوتی عیراق رایگەیاند بۆ هەناردەکردنی نەوت لەگەڵ حکومەتی هەرێمی کوردستان قسەیان کردوە، تا لە رێگەی بۆرییەکانی هەرێمەوە نەوت هەناردە بکەن، بەڵام وەزارەتی سامانە سروشتییەکان رەتیکردەوە لەم کاتەدا هەناردەکردن دەستپێبکاتەوە و چەندین مەرجی داناوە کە پەیوەندییان بە پرسی هەناردەکردنی نەوتی خاوەوە نییە.

ئەمڕۆ یەکشەممە وەزارەتی نەوت عیراق لەسەر هەناردەکردنەوەی نەوت، راگەیەندراویکی بڵاوکردەوە و تییدا هاتووە، لە پەیوەندی بەردەوامدان لەگەڵ  وەزارەتی سامانە سروشتییەکانی هەرێم و ئامادەییان دەربڕیوە بۆ دەستپێکردنەوەی هەناردەکردن بە بڕی لە 300 هەزار بەرمیل لە رۆژێکدا، لە رێگەی بۆری نوتی هەرێمەوە بۆ  بەندەری جەیهان.

وەزارەتەکە ئاماژەی بەوە کردووە،کە بەهۆی رەوشی هەستیاری ناوچەکە و وەستانی هەناردەی باشوور لە رێگەی گەروی هورمزەوە، داوایان لە هەرێم کردووە رۆژانە 300 هەزار بەرمیل نەوتی کێڵگەکانی ناوەڕاست و باکوور، لەگەڵ 200 هەزار بەرمیل نەوتی کێڵگەکانی هەرێم هەناردە بکرێت، بەڵام هەرێم رەتیکردوتەوە.

وەزارەتی نەوتی عیراق دەشڵێت؛ حکومەتی هەرێم چەند مەرجێکی داناوە،  کە پەیوەندییان بە پرۆسەی هەناردەکردنەوە نییە و داوا دەکات لەپێناو بەرژەوەندی نیشتمانی و بۆ قەرەبوکردنەوەی زیانە داراییەکان، هەناردەکردن دەستبەجێ دەستپێبکاتەوە و مەرجەکان بۆ کاتێکی تر جێبهێڵدرێن.

تەندروستی چەمچەماڵ بڵاوکردوەتەوە، لەلایەن لێژنە هاوبەشەکانی قائیمقامییەتی قەزاکەوە 15 تۆن شمەک و خۆراکی بەسەرچوو، کە لە ناو بازاڕ و مارکێت و شوێنە گشتییەکانی چەمچەماڵ دەستی بەسەرداگیراوە لەناوبران.

ئەمڕۆ یەکشەممە، بەڕێوەبەرایەتی تەندروستی چەمچەماڵ رایگەیاند، لە کاتی بەدواداچونەکانیان لەلایەن لیژنە هاوبەشەکانی قائیمقامیەتەوە، توانیویانە دەستبگرن بەسەر  15 تۆن خۆراک وشمەکی بەسەرچوودا

ئاماژەیان بەوەشکردوە، لیژنەهاوبەشەکە لە لە نوێنەرانی قائیمقامیەتی چەمچەماڵ و چاودێری تەندروستی مەڵبەندی خۆپاراستنی تەندروستی چەمچەماڵ و ئاسایشی رۆژئاوای سلێمانی و ڤێتێرنەری و لێژنەی پاککەرەوەی چەمچەماڵ پێکهابوون و بەردەوامیش دەبن لە بەدواداچونەکانیان.

تەندروستی چەمچەماڵ داوا لەهەموو لایەک دەکات، کە لەکاتی بینینی هەر شمەکێکی خراپ و بەسەرچوو ئاگاداریان بکەنەوە.

عەباس عراقچی، رایگەیاندوە، ئەگەر دەستپیشخەرییەکی دادپەروەرانە هەبێت بۆ کۆتایی هاتنی جەنگ پێشوازی لێدەکەن و جەختیشیکردوەتەوە، هێرشەکانیان تەنها تەنها بنکە و بەرژەوەندییەکانی ئەمریکا لە ناوچەکە دەکەنە ئامانج.

عەباس عراقچی، وەزیری دەرەوەی ئێران رایگەیاندوە، ئامادەن لیژنەیەکی لێکۆڵینەوە لەگەڵ وڵاتانی ناوچەکە پێکبهێنین سەبارەت بەو ئامانجانەی، کە هێرشیان کراوەتە سەر و جەختیشیکردوەتەوە تەندروستی موجتەبا خامنەیی رابەری باڵای ئێران زۆر باشەو  سەرقاڵی بەڕیوەبردنی رەوشەکەیە.

ناوبراو دڵنیایی داوە، کە ئەوان تەنها  بنکە و بەرژەوەندییەکانی ئەمریکا لە ناوچەکە دەکەنە ئامانج و ئەوەشیخستەڕوو کە ئەمریکا درۆنێکیان دروست کردوە بەناوی "لۆکاس" و هاوشێوەی درۆنەکانی ئێرانە و ئامانجەکانی وڵاتانی عەرەبی پێدەکاتە ئامانج.

ناوبراو ئاماژەی بەوەشکردوە، هیچ دەستپێشخەرییەکی دیاریکراو لە ئێستادا لەسەر مێزەکە نییە بۆ کۆتاییهێنان بە جەنگەکە، بەڵام ئەگەر دەستپێشخەریی هەبێت بۆ کۆتایـی هاتنـی جەنگ بەشێوازێکی دادپەروەرانە پێشـوازی لێدەکـەن.

جەختیشیکردوەتەوە، گەروی هورمز کراوەیە و  و تەنها بە رووی کەشتییەکانی ئەمریکا  وهاوپەیامنەکانیدا داخراوە.

د.یاد نەقشبەندی، بەرێوەبەری د. یاد نەخۆشخانەی هیوا رایگەیاند، لەسەرەتای ئەمساڵەوە 109 توسبوی نویێ منداڵ لە نەخۆشخانەکە تۆمارکراون، کە 35 بۆ 40 منداڵیان توشبوی شێرپەنجەن، ئاماژەی بەوەشکرد، لە تەواوی عیراقدا پێشکەوتوترین خزمتگوزاری شێرپەنجەی بۆ منداڵان لە نەخۆشخانەی هیوا پێشکەشدەکرێت.

ئەمڕۆ یەکشەممە، لە کۆنفڕانسێکی رۆژنامەوانیدا د. یاد نەقشبەندی، بەرێوەبەری نەخۆشخانەی هیوا  رایگەیاند، لە سەرەتای ئەمساڵەوە تا ئەمڕۆ لە بەشی منداڵانی نەخۆشخانەکە 109 نەخۆش تۆمارکراون و لەو ژمارەیە 35 بۆ 45 منداڵیان توشبوی شێرپەنجەن،  ئەوانی تر نەخۆشی ناشێرپەنجەین، بەڵام لە نەخۆشخانەکە چارەسەر وەردەگرن.

ناوبراو ئاماژەی بەوەشکرد، بەراورد بەساڵانی رابردوو توشبونی منداڵان بە شێرپەنجە زیادی کردوە، بەڵام تائێستا لەسەرو ستانداری جیهانییەوە نییە.

لەبارەی خزمەتگوزارییەکانیشەوە، رایگەیاند، بە دڵنیایەوە لە سەرانسەری عیراق و هەرێمی کوردستان پێشکەوتوترین خزمتگوزاری شێرپەنجەی بۆ منداڵان لە نەخۆشخانەی هیوا پێشکەشدەکرێت و جیا لە چارەسەری پزیشکی هەوڵدەدەن لایەنی دەرونیش پشتگوێ نەخەن، چونکە لایەنی دەرونی یەکێکە لە هۆکارەکانی وەرگرتنی چارەسەر بۆ توشبوەکان و زو چاکببونەوەیان.

د. یاد ئەوەشی خستەڕوو، ئەمڕۆ بۆ دڵخۆشکردنی منداڵە توشبوەکان،  جلوبەرگ و پێداویستی جەژنیان بەسەر منداڵە  توشبوەکان دابەشدەکەن و لای خۆشیەوە سوپاسی هەمو ئەو کەسو لایەنانەی کرد، کە هاوکاریانن لەو کارەدا.

هەروەها بە تایبەتیش سوپاسی رێکخراوی منداڵپارێزی کوردستانی کرد، کە بەردەوام هاوکاری نەخۆشخانەکەن و بەدەم داواکارییەکانیانەوە دێن و ئەمڕۆش بەشێک بوون لە دابینکردنی ئەو جلوبەرگ و پێداویستیانە دەدرێت بە منداڵەکان.

ڤۆلۆدیمیر زێلێنسکی، سەرۆکی ئۆکراین لە چاوپێکەوتنێکی تایبەتدا لەگەڵ کەناڵی سی ئێن ئێنـی ئەمریکی رایگەیاند، کە روسیا فڕۆکەی بێفڕۆکەوانی جۆری "جیران کە کۆپیکراوی شاهیدی ئێرانە" بۆ تاران دابین دەکات بە مەبەستی بەکارهێنانیان لە هێرشکردنە سەر بەرژەوەندییەکانی ئەمریکا و ئیسرائیل لە ناوچەکەدا. 

زێلێنسکی جەختی لەوە کردەوە، کە بەکارهێنانی ئەم درۆنانە، کە ئێستا لە ناوخۆی روسیا بەرهەم دەهێندرێن، دژی بنکە سەربازییەکانی ئەمریکا راستییەکی حاشاهەڵنەگرە و%100 پشتڕاستکراوەتەوە.

 ئەم لێدوانانە لە کاتێکدایە، کە گرژییەکانی ناوچەکە گەیشتوونەتە لوتکە، بەتایبەت دوای ئەوەی لە 28ی شوباتدا ئەمریکا و ئیسرائیل ئۆپەراسیۆنێکی سەربازیی فراوانیان دژی تاران دەستپێکرد بە پاساوی هەڕەشەی ئەتۆمی، کە تێیدا چەندین سەرکردەی باڵای ئێران کرانە ئامانج.

لە بەرانبەردا، سوپای پاسدارانی ئێران وەک وەڵامدانەوەیەک پرۆسەیەکی بەرفراوانی بە موشەک و درۆن بۆ سەر ئامانجە ئیسرائیلییەکان و بنکە ئەمریکییەکان لە وڵاتانی دراوسێ دەستپێکردووە، ئەمەش مەترسییەکانی تەشەنەسەندنی جەنگێکی گشتگیر لە ناوچەکەدا زیاتر کردووە.

وەزارەتی پێشمەرگەی هەرێمی کوردستان، لە راگەیەندراوێکدا، سەرجەم ئەو هەواڵ و دەنگۆیانەی رەت کردەوە، کە باس لە بەشداریی هێزەکانی پێشمەرگە دەکەن لە هێرشکردنە سەر بارەگایەکی حەشدی شەعبی لە سنووری پارێزگای سەلاحەدین.

وەزارەتەکە جەختی لەوە کردووەتەوە، کە هێزەکانیان بە هیچ شێوەیەک بەشێک نین لە گرژی و ململانێ سەربازییەکانی ناوچەکە و بەشداریی هیچ کردەیەکی سەربازییان دژ بە هیچ لایەنێک نەکردووە.

 لە راگەیەندراوەکەدا ئەوەشیان خستوەتەڕوو، ئەرکی سەرەکی هێزەکانیان پاراستنی ئاسایش و سەقامگیرییە و پابەندن بە هەماهەنگی و کاری هاوبەش لەگەڵ هێزە ئەمنییەکانی عیراق

دۆناڵد ترەمپ، سەرۆکی ئەمریکا رایگەیاندوە، بەهۆی داخستنی گەروی هورمزەوە لەلایەن ئێرانەوە ژمارەیەک وڵات زیانیان بەرکەوتوە و دەبێت چارەسەری ئەو کێشەیە بکەین.، داواشی لە چەند وڵاتێک کردوە کەشتی جەنگی بنێر بۆ کردنەوەی گەروەکە.

سەرۆکی ئەمریکا لە پەیامێکیدا لە تۆڕی کۆمەڵایەتی تروس، کە خۆی خاوەندارێتی دەکات نوسیویەتی؛  کۆمەڵێک وڵاتی کاریگەر، کە بەهۆی هەوڵەکانی ئێران بۆ داخستنی گەروی هورمز زیانیان بەرکەوتووە، کەشتی جەنگی رەوانەی ناوچەکە دەکەن.

ترەمپ ئاماژەی بەوە کرد، کە ئامانجی ئەم هەنگاوە هاوبەشە لەگەڵ ئەمریکا، دەستەبەرکردنی ئاسایشی رێڕەوە ئاوییەکان و بەکراوەهێشتنەوەی گەروی هورمزە.

سەرۆکی ئەمریکا جەختی لەوە کردەوە، کە هێزەکانیان توانای سەربازی ئێرانیان بە تەواوی پەکخستووە، بەڵام هێشتا مەترسی هێرشی درۆنی و مینڕێژکردن لەلایەن تارانەوە ماوە.

لە پەیامەکەیدا، دۆناڵد ترەمپ داوای لە وڵاتانی وەک چین، فەرەنسا، ژاپۆن و بەریتانیا کردوە بەشداری بکەن لە کۆتاییهێنان بەو هەڕەشانە و رایگەیاندوە، ئەمریکا بەردەوام دەبێت لە بۆردومانکردنی کەناراوەکان و تێکشکاندنی هەر بەلەم و کەشتییەکی ئێرانی، کە بێتە ناو ئاوەکانەوە و ببێتە هۆی مەترسی.

لیندسی گراهامی سیناتۆری کۆمارییەکان پشتیوانی خۆی بۆ بڕیارەکەی سەرۆکی ئەمریکا دەربڕی سەبارەت بە گواستنەوەی جەنگ بۆ دورگەی خارک و هێرشکردنە سەر ئەو دورگەیە، کە بە شا دەماری ئابوری نەوت و گازی ئێران دادەنرێت. 

سیناتۆرە ئەمریکییەکە لە پەیامێکیدا لە ئێکس رایگەیاندوە، هەرکەسێک بتوانێت دورگەی خارک کۆنتڕۆڵبکات دەتوانێت جەنگەکە یەکلای بکاتەوە.

ناوبراو ئاماژەی بەوە کردوە، کە ئەم هەنگاوەی سەرۆکی ئەمریکا  بوێرانە و کاریگەرە، دەبێتە هۆی کورتکردنەوەی ماوەی جەنگەکە، چونکە کەمجار رودەدات لە مێژووی جەنگەکاندا دوژمن یەک ئامانجی ستراتیژی لەو شێوەیەی هەبێت کە گۆڕانکاری بنەڕەتی لە ئەنجامی ململانێکاندا دروست بکات.

 گراهام جەختیشی کردەوەتەوە، کە لەدەستدانی ژێرخانی نەوتی خارک بە واتای لەناوچونی ئابوری ئێران دێت و دەڵێت؛ "هەرکەسێک کۆنتڕۆڵی دوورگەی خارک بکات، کۆنتڕۆڵی چارەنووسی ئەم جەنگەی لەدەستدایە."

حکومەتی هەرێم راگەیەندراویكی بڵاوکردوتەوە و تێیدا هاتوە، بە توندترین شێوە هێرشکردنە سەر کونسوڵخانەی ئیمارات لە هەولێر دەکەین، ئاماژەیان بەوەشکردوە، ئەو هێرشە تیرۆرستییەی دەکرێتە سەر هەرێم پێشێلکارییەکی ئاشکرای یاسای نێودەوڵەتی و سەروەری خاکی هەرێمە.

لە بەشێکی تری راگەیەندراوەکەدا هاتووە؛  پێویستە حکومەتی فیدراڵ، بەرپرسیاریەتی یاسایی خۆی هەڵبگرێت و سنورێک بۆ ئەو هێز و گروپ و میلیشیا لەیاسادەرچووانە دابنێت، کە بوونەتە هەڕەشەیەکی راستەقینە بۆ خەڵکی هەرێم و عیراق.

 

ڕاگەیاندراوێک لە حکومەتی هەرێمی کوردستانەوە

حکومەتی هەرێمی كوردستان، بە توندترین شێوە، هێرشکردنە سەر کونسوڵخانەی گشتیی دەوڵەتی ئیمارات لە هەولێر و هەموو هێرشێک بۆ سەر خاک و دامەزراوەکانی هەرێمی کوردستان و کونسوڵخانە و نێردە دیپلۆماتییەکان شەرمەزار دەکات.

ئەم هێرشە تیرۆریستی و تێکدەرانەیەی کە دەکرێنە سەر هەرێمی کوردستان، پێشێلکردنی ئاشکرای یاسای نێودەڵەتی و سەروەریی خاکی هەرێمی کوردستان و عێراقە و هیچ پاساوێک هەڵناگرێت و پێویستە حکومەتی فیدراڵ، بەرپرسیاریەتی یاسایی خۆی هەڵبگرێت و سنوورێک بۆ ئەو هێز و گرووپ و میلیشیا لەیاسادەرچووانە دابنێت کە بوونەتە هەڕەشەیەکی ڕاستەقینە بۆ خەڵکی هەرێمی کوردستان و عێراق بە گشتی و لە ئەنجامی پەلامار و هێرشە ناڕەواکانیان، دەیان کەس بوونەتە قوربانی و زیانێکی زۆر بە هەرێمی کوردستان و عێراق بە گشتی کەوتووە.

حکومەتی هەرێمی کوردستان
2026/3/14

وەزیری بەرگری ئیسرائیل دەڵێت: جەنگی دژ بە ئێران گەیشتووەتە قۆناغێکی یەکلایکەرەوە و بەردەوام دەبن لە هێرشەکانیان.

ئیسرائیل کاتس، وەزیری بەرگریی ئیسرائیل، لە کاتی هەڵسەنگاندنی بارودۆخی ئەمنیی وڵاتەکەی، پەیامێکی ئاراستەی تاران کرد و رایگەیاند کە ململانێکان گەیشتوونەتە ئاستێکی نوێ و ئەم پڕۆسەیەش تا ئەو کاتەی پێویست بێت بەردەوام دەبێت.

ئاماژەی بەوەکرد، تەنها گەلی ئێران دەتوانن کۆتایی بەم رەوشە بهێنن، ئەویش لە رێگەی "خەباتێکی بڕیاردەرانە" تا روخانی دەسەڵاتەکەیان.

کاتز ئەوەشی خستەروو، ئیسرائیل ئامادەیە بۆ بەردەوامبوون لە فشارە سەربازییەکانی تا گەیشتن بە ئامانجی کۆتایی.

ئەم لێدوانانە لە کاتێکدایە کە ناوچەکە لەناو جەنگێکی بەرفراواندایە و هێرشە ئاسمانییەکانی ئەمریکا و ئیسرائیل بۆ سەر بنکە ستراتیژییەکانی ئێران بەردەوامییان هەیە.